युरोपमा नेपाल चिनाउने कार्यक्रम

बार्सिलोना । स्पेनमा रहेका नेपालीहरुले आइतबार पर्यटकीय सहर बार्सिलोनामा मिनी नेपालको झल्को दिएका छन् । विश्व प्रसिद्ध रोमन क्याथोलिक गिर्जाघर अगाडि विभिन्न भेषभूषामा सजिएका उनीहरुको नृत्यले विदेशीहरुको ध्यान केन्द्रित गरेका छन् ।

१४१ वर्षअघि शिलान्यास भएर पनि अझै बनिरहेको ‘सग्रादा फैमिलिया’ नामको चर्च हेर्न बर्षेनी लाखौं पर्यटकहरुको भीड लाग्ने गर्छ । भूमिगत रेलमार्ग हुँदै चर्च पुगेका पर्यटकहरु आइतबार नेपाली गीत संगीतमा रमाएका थिए । बार्सिलोना नगरपालिकाको सामुदायिक विकास योजना (प्ला कमुन्तारी) साग्रदा फैमिलियाको अन्तर साँस्कृतिक कार्यक्रम नेपाली जनप्रगतिशिल मञ्च स्पेनको पहलमा सम्पन्न भएको हो ।

ठूलो संख्यामा विदेशीहरुले कार्यक्रमको अवलोकन गरेको नेपाली जनप्रगतिशील मञ्च स्पेनका अध्यक्ष विशाल ढुंगानाले बताए । कलासंस्कृति मार्फत पर्यटन प्रवर्द्धन गर्ने उद्देश्यले बेल्जियममा नेपाल फेस्टिबल कार्यक्रम सम्पन्न भएको छ ।

एनआरएनए बेल्जियमको आयोजना, नेपाली राजदूतावासको संयोजन तथा बेल्जियममा सक्रिय नेपाली सघंसस्थाको सहकार्यमा कार्यक्रम लुभेन सहरमा सम्पन्न भएको हो ।