- २७ श्रावण २०८३, बुधबार / Aug 12, 2026
काठमाडौं । जुम्ला तिला गाउँपालिका–९ रासाका २३ वर्षीय दिनेशकुमार राउत यौन दुर्व्यवहार आरोपमा पक्राउ परेका छन् । टिकटक मार्फत पीडित महिलासँग साथी बनेर अनलाइन माध्यमद्वारा महिलालाई यौन दुर्व्यवहार गरेको आरोपमा उनलाई पक्राउ गरिएको हो ।
पटक–पटक भेट्न बोलाउने र बोलाएको स्थानमा भेट्न नजाँदा फेक आईडीमार्फत अश्लील क्याप्सन राखी, अश्लील भिडियो तथा तस्बिर पोष्ट गरेर आफ्नो चरित्रहत्या गरेको भन्दै पीडित महिलाले दिएको उजुरीका आधारमा राउतलाई आइतबार भक्तपुरबाट पक्राउ गरिएको प्रहरीले जनाएको छ ।
विद्युतीय कारोबार ऐन २०६३, अपराध अन्तर्गतको कसुरमा काठमाडौं जिल्ला अदालतबाट पक्राउ अनुमति लिएर नेपाल प्रहरीको साइबर ब्युरोको टोलीले उनलाई पक्राउ गरेको हो । सोमबार सात दिनको म्याद थपेर घटनाको अनुसन्धान भइरहेको प्रहरीले जनाएको छ ।
