- ३ कार्तिक २०८३, मंगलवार / Oct 20, 2026
काठमाडौं । अमेरिकी सहयोग नियोग मिलेनियम च्यालेन्ज कर्पोरेसन (एमसीसी) सँगको सम्झौता संसद्बाट अनुमोदन गर्न राष्ट्रिय सहमति गर्नै पर्ने नेपाली कांग्रेसका नेताहरूले सभापति शेरबहादुर देउवालाई सुझाव दिएका छन् ।
कार्यसम्पादन समिति बैठकमा नेताहरूले एमसीसी पास गर्नुको विकल्प नभए र यसका लागि राष्ट्रिय सहमति आवश्यक भएको देउवालाई सुझाव दिएका हुन् ।
महाधिवेशनपछि पहिलो कार्यसम्पादन समिति बैठकमा एमसीसी सम्झौता संसद्बाट अनुमोदन गर्नेबारे नेताहरू एकमत देखिएका हुन् । स्थानीय चुनावको तयारी, भ्रातृ तथा शुभेच्छुक संस्थालगायत एजेन्डालाई पनि बैठकमा उठाएर नेताहरु एमसीसीमा केन्द्रित भएका हुन ।
सार्वभौम संसद्मा संसदीय प्रक्रियामार्फत निकास दिनुपर्ने नेता प्रकाशमान सिंहको भनाइ छ । परिस्थिति गम्भीर हुन सक्ने संकेत गर्दै सिंहले एमसीसी पास गर्नुभन्दा पहिले सहमति गरेर संसद्मा पेस गर्नु पर्ने र त्यसमाथिका भ्रम निवारण गर्नुपर्ने बताए ।
बैठकमा नेताहरू शेखर कोइराला, बालकृष्ण खाँण, ज्ञानेन्द्रबहादुर कार्की, सुजाता कोइराला र जीवनबहादुर शाहीले पनि एमसीसीमा राष्ट्रिय सहमतिको खाँचो रहेको धारणा राखे ।
केन्द्रीय कार्यसम्पादन समितिको बैठक म्याद सकिएका भ्रातृ एवं शुभेच्छुक संस्थाबारे कुनै निर्णय नगरी सकिएको छ । बैठकले बाँकी १६ जिल्लाको अधिवेशन फागुन १३ गते गर्ने निर्णय गरेको कांग्रेस प्रवक्ता डा. प्रकाशशरण महतले बताए ।
