- १४ जेष्ठ २०८३, बिहीबार / May 28, 2026
काठमाडौं । त्रिपुरेश्वरमा रहेको राहदानी विभागको बेसमेन्टमा रहेका संरचनाहरू हटाएर काठमाडौं महानगरपालिकाले अब पार्किङ स्थलका रुपमा परिणत गराएको छ ।
महानगरपालिकाले राहदानी विभागको बेसमेन्टमा रहेका संरचनाहरू हटाएको हो । सेवा लिन जाने सेवाग्राहीले आफ्ना गाडी विभागबाहिर नै पार्किङ गर्नुपर्ने बाध्यता थियाे ।
गाडी आउजाउमा समस्या आएकाे भन्दै गुनासो आएपछि महानगरपालिकाले अध्ययन गरेर बेसमेन्टरका संरचना हटाएको हो । विभागले सवारी पार्किङका लागि छुट्याउनुपर्ने बेसमेन्टमा प्रतिक्षालय बनाएको थियो ।
बेसमेन्टमा रहेका संरचनासहित बेञ्चहरू हटाएर पार्किङका लागि खाली गराएको हो । अवैध संरचना हटाइसकेपछि महानगरपलिकाका नगर प्रहरी बलका प्रमुख नगर प्रहरी उपरीक्षक राजु पाण्डेले यसरी अवैध संरचना बनाएका ठाउँ तीन सय वटाभन्दा बढी रहेको बताए ।
उनले भवन निर्माण गर्दा के प्रयोजनका लागि नक्सा पास गरिएको हो भन्ने कुरा स्पष्ट खुलाइएकोले प्रयोजनअनुसारको काम गर्नुपर्ने बताए । नागरिकले पनि आफ्नो तहबाट जिम्मेवारी भूमिका निर्वाह गर्नुपर्ने उनको भनाइ छ ।
काठमाण्डौ महानगर क्षेत्रका व्यावसायिक प्रतिष्ठानका भवन र सार्वजनिक भवनमा गाडी पार्किङका लागि भनेर बेसमेन्ट बनाउन ‘कर छुट’ को सुविधा लिइए पनि अन्य प्रयोजनमा प्रयोग भएको पाइएपछि महानगरपालिकाले साउन महिनामा नै ३५ दिने सूचना जारी गरेको थियो ।
त्यो सूचनाको पालना गरेको नपाइएपछि स्थलगत अनुगमन नै थालेर अवैध संरचनाहरू हटाउन सुरु गरेको हो । विभागले भने भवनको नक्साअनुसार बेसमेन्टमा पार्किङ राख्ने पहल गर्ने जनाएको छ ।
राहदानी विभागले अब बेसमेन्टमा आउँदो आइतवारदेखि पार्किङ हुने जनाएको छ । विभागले सूचना नै निकालेर यस्तो जानकारी दिएको छ ।
