- ९ असार २०८३, मंगलवार / Jun 23, 2026
काठमाडौं । केन्द्रीय अनुसन्धान ब्युरो (सिआइबी)ले जग्गाधनीमाथि अनुसन्धान थालेपछि बालुवाटारस्थित ललितानिवास परिसरका जग्गाधनीले सरकारलाई जग्गा फिर्ता गर्न थालेका छन् ।
सिआइबीले जग्गाधनी सिपिका खेतानलाई पक्राउ गरेपछि उनले डिल्लीबजार मालपोत कार्यालयमा जग्गा सरकारको नाममा नामसारी गरेकी थिइन् । जग्गा फिर्ता गरेर जानकारी सिआइबीलाई दिँदै आफूलाई रिहा गर्न मागसमेत गरेकी छिन् ।
जग्गा फिर्ता गर्नेलाई साक्षीका रूपमा अदालतमा पेस गर्नेबारे जिल्ला सरकारी वकिल कार्यालयसँग सिआइबीले छलफल थालेको छ । खेतानको नाममा हाल ललितानिवास परिसरको आठ आना जग्गा रहेको छ । व्यवसायी मीनबहादुर गुरुङसँग उनले सो जग्गा खरिद गरेकी थिइन् ।
जग्गा जफतको प्रयोजनका लागि अख्तियार दुरुपयोग अनुसन्धान आयोगले पनि उनीविरुद्ध विशेष अदालतमा मुद्दा दायर गरेको थियो । भूमाफिया गिरोहसँग संलग्न र पछि खरिद गर्ने दुई किसिमका जग्गाधनी यसमा सहभागि छन् ।
सोहीअनुसार अनुसन्धान गरिरहेको र केहीले जग्गा फिर्ता गरेर निवेदन दिन थालेको सिआइबी एसएसपी दिनेश आचार्यले बताए । सो प्रकरणमा जग्गाधनीमाथि पनि अनुसन्धान भइरहेको उनको भनाइ छ ।
यसअघि अख्तियारले जग्गा फिर्ता गरेकै आधारमा सर्वोच्च अदालतका न्यायाधीश कुमार रेग्मी तथा एमाले नेता विष्णु पौडेलका छोरा नवीनलाई मुद्दा नचलाउने ‘विवादित निर्णय’ गरेको थियो ।
सिआइबीले यसमा २२ जना पक्राउ गरेकोमा खेतानसँगै केशव तुलाधरलाई समेत थुनामा राखेको छ ।
