- ९ श्रावण २०८३, शनिबार / Jul 25, 2026
काठमाडौं । लुम्बिनी र गण्डकी प्रदेशले बिहीबार नयाँ मुख्यमन्त्री पाएको छ । लुम्बिनीमा कांग्रेस नेता डिल्लीबहादुर चौधरी र गण्डकीमा कांग्रेसकै सुरेन्द्र पाण्डे मुख्यमन्त्री बनेका हुन् ।
लुम्बिनीका प्रदेश प्रमुख अमिक शेरचनले चौधरी र गण्डकीका प्रदेश प्रमुख पृथ्वीमान गुरुङले पाण्डेलाई संविधानको धारा १६८ (२) अनुसार नियुक्त गरेका हुन् । चौधरीले प्रदेशसभाका ५३ सांसदको हस्ताक्षरसहित दाबी पेस गरेका थिए भने उनलाई माओवादी, जसपा, लोसपा, नाउपा, जनमत, एकीकृत समाजवादी र एक स्वतन्त्र सांसदको समर्थन रहेको छ।
मुख्यमन्त्री लीला गिरीले वैशाख ११ गते प्रदेशसभाबाट विश्वासको मत पाउन नसकेपछि पदमुक्त भएका थिए । नवनियुक्त मुख्यमन्त्री चौधरीको शपथग्रहण शुक्रबार हुने प्रदेश प्रमुखको कार्यालयले जनाएको छ। उनले शुक्रबार नै सानो आकारको मन्त्रीमण्डल विस्तार गर्ने भएका छन् ।
चौधरी चौथो मुख्यमन्त्री बनेका छन्। गण्डकीमा मुख्यमन्त्री नियुक्त पाण्डेले माओवादीसमेतको समर्थन जुटाएर बहुमत सांसदको हस्ताक्षरसहित बिहीबार प्रदेश प्रमुख गुरुङसमक्ष दाबी पेस गरेका थिए ।
संविधानको धारा १६८ (२) अनुसार दुई वा दुईभन्दा बढी दलको समर्थनमा प्रदेश सरकार बन्न सक्ने व्यवस्थाबमोजिम पाण्डे मुख्यमन्त्री नियुक्त भएका हुन्। गण्डकी प्रदेशसभामा कांग्रेसका २७, एमालेका २२, माओवादीका ८, राप्रपाका २ र १ स्वतन्त्र सांसद छन् ।
