संकटकाल घोषणा

एजेन्सी ।  मिसिसिपी र अल्बामा भीषण आँधीबाट २६ जनाले ज्यान गुमाएका र सयौं घाइते भएकाकारण अमेरिकी राष्ट्रपति जो बाइडनले संकटकाल घोषणालाई अनुमोदन गरेका छन् । दक्षिणी राज्य मिसिसिपीमा विनाशकारी आँधीका कारण गरिए संकटकाल घोषणा गरिएको हो ।

उनले ‘भीषण आँधीबेहरी र चक्रवात’ बाट प्रभावित क्षेत्रमा पुनःस्थापना प्रयासहरूलाई पूरक बनाउन संघीय सहायताको आदेशसमेत दिएका छन् । राज्य सरकारले यसअघि संकटकाल घोषणा गरेको थियो । मिसिसिपी आपत्कालीन व्यवस्थापन निकायले विज्ञप्ति जारी गर्दै आइतबार साँझ राज्यको ठूलो हिस्सामा भीषण आँधीबेहरी आएको र यो अझै सक्रिय रहन सक्ने बताएको छ ।

मिसिसिपी र अल्बामा भीषण आँधीबाट २६ जनाले ज्यान गुमाएका छन् । सयौं घाइते भएका छन् । खोज तथा उद्धार प्रयास जारी छ । रोलिङफार्क अति प्रभावित भएको छ । कुच्चिएका मोटरकार, इँटा र सिसाले सडक भरिएको छ । सहर भग्नावशेषमा परिणत भएको छ । पश्चिमी शार्की काउन्टीको अवस्था पनि त्यस्तै छ । सबैतिर तहस–नहस, वरिपरिको खेतबारी आँधीको चपेटामा परेको छ ।