संसदको दुवै सदनको संयुक्त बैठक बस्दै

काठमाडौं । प्रतिनिधि सभा र राष्ट्रिय सभाको संयुक्त बैठक बस्दैछ ।संघीय संसदको संयुक्त सञ्चालन नियमावली मस्यौदा प्रतिवेदनमा छलफल गर्न संयुक्त बैठक बुधबार अपराह्न बस्न लागेको हो ।

प्रतिनिधि सभाको मंगलबारको बैठकमा सभामुख देवराज घिमिरेले संयुक्त बैठकबारे जानकारी दिएका थिए । प्रतिनिधि सभाको बैठक बिहान ११ बजे बस्दैछ ।

बैठकमा गत जेठ ५ गते राष्ट्रपति रामचन्द्र पौडेलले प्रस्तुत गरेको सरकारको नीति तथा कार्यक्रममाथि सांसदहरूले धारणा राखिरहेका छन् ।

प्रमुख प्रतिपक्षी दल नेकपा एमालेका सांसदहरूले नीति, कार्यक्रमलाई गतिहीन दस्तावेज भनेर संज्ञा दिएका छन् । अरू विपक्षी दलका सांसदहरूले कार्यान्वयनमा शंका व्यक्त गरेका छन् ।

राष्ट्रिय सभाको मंगलबारको बैठकमा बहुमतले नीति, कार्यक्रम पारित गरिसकेको छ ।