- २ श्रावण २०८३, शनिबार / Jul 18, 2026
काठमाडौं । दुर्गम जिल्लामा खाद्य व्यवस्था तथा व्यापार कम्पनी लिमिटेडले थप २७ हजार क्विन्टल चामल ढुवानी गर्न लागेको छ ।
चालु आर्थिक वर्षका लागि स्वीकृत कोटाले अपुग भएपछि १२ जिल्लाबाट थप माग आएकोमा कम्पनीले २६ हजार ९ सय ७० क्विन्टल चामल पठाउन लागेको हो । १२ जिल्लाबाट ४३ हजार १ सय ७० क्विन्टल चामलको माग आएकोमा २६ हजार क्विन्टल चामल पठाउन लागिएको कम्पनीका नायब महाप्रबन्धक श्रीमणिराज खनालले बताए ।
सोमबारदेखि नै चामल ढुवानी गरिने उनको भनाइ छ । हुम्लामा २५ हजार क्विन्टल चामल केही दिनमै पठाउने बताए । कर्णालीका धेरै जिल्लाबाट धेरै चामलको माग आएको कम्पनीले जनाएको छ ।
कर्णालीमा खाद्यान्न उत्पादन नहुँदा बर्सेनि अभाव हुने गर्छ । कम्पनीले सोलुखुम्बुमा एक हजार क्विन्टल चामल ढुवानी गर्न लागेको छ । भोजपुरमा पाँच सय क्विन्टल चामल पठाउन लागिएको छ ।
दैलेखमा एक हजार पाँच सय क्विन्टल, जुम्लामा दुई हजार पाँच सय क्विन्टल चामल पठाउन लागिएको कम्पनीले जनाएको छ । अछाममा दुई हजार पाँच सय क्विन्टल र दार्चुलामा पाँच हजार चार सय क्विन्टल चामल ढुवानी गर्न लागिएको कम्पनीले जनाएको छ ।
बाजुरामा तीन हजार पाँच सय क्विन्टल, जाजरकोटमा चार हजार क्विन्टल थप चामल ढुवानी गर्न लागिएको कम्पनीले जनाएको छ । मुगुमा दुई हजार पाँच सय क्विन्टल, मुस्ताङमा २७० क्विन्टल ढुवानी गर्न लागिएको छ ।
यस्तै रुकुमपश्चिममा एक हजार पाँच सय क्विन्टल र बैतडीमा एक हजार क्विन्टल चामल ढुवानी गर्न लागिएको कम्पनीले जनाएको छ । १२ वटा जिल्लामा हालसम्म ३७ हजार ४२४ क्विन्टल चामल ढुवानी भएको कम्पनीले जनाएको छ ।
खाद्यान्न ढुवानी गर्ने म्याद असारसम्म भएकाले पनि धेरै ठाउँमा चामल पुग्न बाँकी रहेको कम्पनीले जनाएको छ । स्थानीयस्तरमा पर्याप्त उत्पादन नहुँदा कर्णालीका जुम्ला, कालीकोट, हुम्ला, मुगुलगायतका अन्य दुर्गम जिल्लामा खाद्य कम्पनीले चामल पठाउने गर्दछ ।
