- २० आश्विन २०८३, मंगलवार / Oct 6, 2026
काठमाडौं । बहुमतसहित प्रधानमन्त्रीमा दाबी गर्न राष्ट्रपति विद्यादेवी भण्डारीले दलहरूलाई आइतबार ५ बजेसम्मको समय दिएकी छन् । कसको नेतृत्वमा सरकार बनाउने भन्नेमा दलहरूबीच सहमति जुट्न सकेको छैन । सत्ता गठबन्धनका पाँच दलले गठबन्धनकै दलहरू मिलेर सरकार बनाउने बताउँदै आएका छन् । तर नेतृत्वमा आ आफ्नै दावी गरिरहेका छन् ।
कांग्रेस सभापति शेरबहादुर देउवा छोड्दै नछोड्ने भनिरहेका छन् भने माओवादी केन्द्रका अध्यक्ष पुष्पकमल दाहाल (प्रचण्ड) प्रधानमन्त्री बन्ने रस्साकस्सीमा जुटेका छन् । सहमति नदिए देउृवासंगको साथ छोड्ने अभिव्यक्ति समेत दिएका छन् । सरकारको नेतृत्व आफूलाई दिने ‘पूर्वसहमति’ पालना गर्नुपर्ने प्रचण्डको अडान कायमै छ ।
चुनावमा पहिलो पार्टी बनेकाले सरकारको पहिलो नेतृत्व कांग्रेसले गर्नुपर्ने अडान देउवाले लिएका छन् । पहिलो दुई वर्ष देउवा र त्यसपछि प्रचण्डलाई प्रधानमन्त्री बनाउन सकिने कांग्रेसले भनेको छ । तर प्रचण्ड कुनै हालतमा पनि पहिलो दुई वर्ष प्रधानमन्त्री आफुुले नछोड्ने भनिरहेका छन् । यतिबेला अध्यक्ष प्रचण्ड प्रधानमन्त्रीका लागि दौडधुप र भेटघाटमा व्यस्त छन् ।
नेतासँग अनौपचारिक बार्गेनिङ गरिरहेका उनलाई कांग्रेसले स्वीकार नगरे एमालेसँग मिलेर आफू प्रधानमन्त्री बन्ने दाउ हेरिरहेका छन् । राष्ट्रपति, सभामुखलगायतमा सम्झौता गरेर भए पनि प्रचण्ड तत्काल नै प्रधानमन्त्री हुन चाहेको नेताहरू बताएका छन् ।
एकीकृत समाजवादीका अध्यक्ष माधव नेपालसहित भएको भेटवार्तामा पनि प्रचण्डले आफूलाई प्रधानमन्त्री बनाउन प्रस्ताव राखेका थिए ।
कांग्रेसले नमाने वाम गठबन्धन गरेर सरकार बनाउने पहल पनि भइरहेको नेताहरुले बताएका छन् । सरकार गठनका विषयमा एमाले भने ‘पर्ख र हेर’को अवस्थामा रहेको छ । गठबन्धन तोडेमा माओवादी केन्द्रका अध्यक्ष प्रचण्डलाई प्रधानमन्त्री स्वीकार गर्न एमाले तयार रहेको एमाले महासचिव शंकर पोखरेलले बताए ।
