- २८ जेष्ठ २०८३, बिहीबार / Jun 11, 2026
रुपन्देही । सिद्धार्थनगर नगरपालिकाले छाडा साँढेलाई ट्रकमा बाँधेर घिसारेपछि नगरपालिकाको चौतर्फी चर्को आलोचना भएको छ ।
नगर प्रहरीले बुधबार साँझ लु १ ग ३६२ नम्बरको ट्रकको पछाडि साँढेलाई रक्ताम्य हुने गरी बाँधेर घिसार्दै लगेपछि स्थानीयले नगर प्रमुख इस्तियाक अहमद खानविरुद्ध नाराबाजी गरेका गरेका छन् ।
अहिले साँढेलाई रक्ताम्य पारी घिसार्दै गरेको तस्वीर सामाजिक संजालमा भाइरल भएको छ । छाडा चौपाया व्यवस्थापन गर्ने नाममा निर्ममतापूर्वक घिसारेर लगिएको घटनामा संलग्नलाई कारबाही गर्न नागरिकहरुले आवाज उठाएका छन् ।
राष्ट्रिय प्रजातन्त्र पार्टी सिद्धार्थनगरका नेता अजय गुप्ताले कारबाही गर्न नगर प्रमुखलाई ज्ञापनपत्र समेत दिएका छन् ।
नेकपा (एमाले) सिद्धार्थनगरका सचिव नारायण प्रसाद भण्डारीले पनि जिउँदो पशुलाई ट्रकले घिसार्दै रक्ताम्य बनाउनु असह्यै भएको भन्दै दोषीलाई कारबाही र यसबारे नगर प्रमुखले जवाफ दिनुपर्ने बताए ।
चौतर्फी विरोध र कारबाहीको माग आएपछि सिद्धार्थनगर नगरपालिकाका प्रमुख इश्तियाक खानले दोषी कर्मचारीलाई कारबाही गर्ने बताए ।
