सिट बाँडफाँट गर्न कार्यदलको बैठक बस्दै

काठमाडौं । प्रतिनिधिसभा र प्रदेशसभा सदस्यका लागि सिट बाँडफाँट गर्न कार्यदलको बैठक बस्दै छ । प्रधानमन्त्री निवास बालुवाटारमा दिउँसो २ बजे बस्ने बैठकमा मोडालिटीमा सिट बाँडफाँट गर्ने विषयमा छलफल हुने कार्यदलका सदस्य बेदुराम भुसालले बताए ।

साउनभित्रमा सिट बाँडफाँटको खाका तयार गर्न कार्यदलको दोस्रो बैठक बस्न लागेको हो । गठबन्धनका दलहरूबीचमा प्रतिनिधिसभाका १६५ र प्रदेशसभाका ३३० वटै क्षेत्रमा गठबन्धन गर्ने भएको छ । १ सय ६५ सिटमध्ये कांग्रेसको भागमा १०० सिट हुनुपर्ने पक्षमा कांग्रेस नेताहरू छन् । माओवादी केन्द्रले दोस्रो ठूलो दलका रुपमा दाबी गरेको छ ।

स्थानीय तहको निर्वाचनबाट कांग्रेस मात्र नभई माओवादी केन्द्र पनि हौसिएको छ । दुईवटा मोडेलमा छलफल सुरु भएको नेताहरुले बताएका छन् । पहिलो, स्थानीय तहको निर्वाचनका आधारमा जसको प्रभाव जहाँ राम्रो छ, त्यहीअनुसार अघि बढ्ने । दोस्रो, ०७४ सालको संघीय निर्वाचनमा आफूले जितेका क्षेत्रमा दाबी यथावत् राख्ने उनीहरुको तर्क छ ।

स्थानीय तहको निर्वाचनको नतिजाले कांग्रेस एक्लैले पनि प्रदेश र प्रतिनिधिसभाको निर्वाचनमा एकल बहुमत ल्याउन सक्ने भन्दै कांग्रेसका केही नेताहरू गठबन्धनबिरुद्ध पनि बोल्न थालेका छन् ।