- ९ बैशाख २०८३, बुधबार / Apr 22, 2026
एजेन्सी । सिरियामा पछिल्ला केही दिनयता जारी रहेको हिंसाप्रति संयुक्त राष्ट्रसङ्घीय महासचिव एन्टोनियो गुटरेसले चासो व्यक्त गरेका छन् ।
केही दिनयता सिरियाका विभिन्न भूभागमा हिंसात्मक हमला भएर केही व्यक्तिको ज्यान गएको तथा कैयौँ व्यक्ति विस्थापित हुन पुगेको घटनाप्रति चासो व्यक्त गरेको प्रवक्ता स्टेफान डुजारिकले बताएका छन् ।
महासचिव गुटरेसले यस्तो आक्रमणलाई रोकी सबै पक्षले शान्ति र संयम अपनाउन आग्रह गरेका छन् । हमलाबाट उत्तरपूर्वी सिरियाली नगर इडलिबका कैयौँ मानिस विस्थापित हुन पुगेको बताइएको छ ।
यसवर्ष उत्तरी सिरियामा मात्र एक सय २१ जनाको यस्तै आक्रमणबाट ज्यान गएको छ भने दुई सयभन्दा बढी व्यक्ति घाइते भएका छन् । यहाँका ४० लाखभन्दा बढी व्यक्ति सो हिंसात्मक हमलाबाट प्रभावित भएका छन् । उनीहरुमध्ये अधिकांश बालबालिका र महिला रहेका छन् ।
