सीमा अतिक्रमणविरूद्व नेमकिपाले सडक र सदन संघर्ष गर्ने

नेपाल मजदुर किसान पार्टीले चर्काे विराेध गर्दै भारतले नेपालकाे भूभाग अतिक्रमण गरी जारी गरेको नक्साको विरूद्व विरोध र्‍याली प्रदर्शन गरेको छ । भक्तपुरको कमलविनायकबाट सुरू गरेको विरोध र्‍याली सूर्यविनायक पुगेर सभामा परिणत भएको थियो ।

नेपालकाे लिपुलेक, लिम्पियाधुरा र कालापानीलाई भारतले नयाँ नक्सामा आफ्नो देशको भूभागका रूपमा प्रस्तुत गरेपछि नेमकिपाले त्यसको कडा विरोध गरेकाे हो । विरोधसभामा नेमकिपाका सचिव एवं प्रतिनिधिसभाका सांसद प्रेम सुवालले सीमा अतिक्रमण गरेर जारी गरेको नक्साका बारेमा सरकारले तत्काल अन्तर्राष्ट्रिय मञ्चलाई घच्घचाउनु पर्ने बताए ।

सत्तामा रहेका दल र ठूला राजनीतिक दलहरूले तत्काल भारतको विरोध गर्न नसक्दा भारतले सीमा अतिक्रमण गरेको उनकाे तर्क छ । भारतले सीमा अतिक्रमण गरेको नक्सा नसच्चाए नेमकिपाले सडक र सदनमा विरोध जारी राख्ने सांसद सुवाल बताए ।