सेनाको निगरानीमा मतपत्र छापिदै

काठमाडौं । वैशाख ३० गते तय भएको स्थानीय तहको निर्वाचनका लागि सुरक्षाकर्मीको निगरानीमा मतपत्र छाप्ने भएको छ । जनक शिक्षा सामग्री केन्द्रले छपाइको जिम्मा पाएको छ ।

निर्वाचन आयोगले १७ चैतमा नमुना मतपत्र र त्यसपछि २ करोड थान मतपत्र छाप्ने निर्णय गरेसँगै जनक शिक्षाले चाँजोपाँजो मिलाएको हो । मतपत्र छपाइ स्थलमा नेपाली सेनाको टोली आज आउँदै गरेको जनक शिक्षाका सूचना अधिकारी चित्रकुमार आचार्यले बताए ।

उनले भने, ‘नेपाली सेनासहित १५० जना सुरक्षाकर्मीको निगरानीमा मतपत्र छपाइ हुनेछ, आयोगबाट निर्देशन आए लगत्तै हामी मतपत्र छपाइको काम थाल्नेछौं, ‘त्यसका लागि सेनाको टोली आज आउँदैछ ।’

मतपत्र छपाइस्थलमा नेपाली सेना, नेपाल प्रहरी र सशस्त्र प्रहरीको तीन घेरामा सुरक्षा तैनाथ हुने उनको भनाइ छ । प्रवेश स्थलमा सेनाले जाँच गर्ने छ भने सिसिटिभी क्यामेरा थप गरिएको छ । कहाँ कहाँ सिसिटिभी क्यामेरा थपिए त्यो भने सेनाले जानकारी दिएको छैन । २ करोड मतपत्र छाप्न ९ वटा मेसिन प्रयोग गरिने जनाइको छ ।