होटलमा महिला र पुरूष मृत

रुपन्देही । बुटवलस्थित एक होटलमा बास बसेका एक महिला र एक पुरूष मृत भेटिएका छन् । धादिङको कुम्पुर घर भएका अन्दाजी ३६ वर्ष उमेरका सिताराम भुजेल र दाङ घर भएकी अन्दाजी ३३ वर्षकी पुष्पा मृत फेला परेका हुन् ।

तिनाउ पुल नजिकै फूलबारी चोकमा रहेको स्याङजा कारीकोटे होटलको कोठा नं. १३४ मा उनीहरु आइतबार राति सँगै बसेका थिए । सोमबार बिहान कोठामा जाँदा महिला पलङमा उत्तानो परेको अवस्थामा र पुरूष कोठाको पंखामा झुण्डिएको अवस्थामा मृत फेला परेको इलाका प्रहरी कार्यालय बुटवलले जनाएको छ ।

उनीहरुको मृत्युको कारण अनुसन्धान भइरहेको प्रहरी निरीक्षक सन्तोष घिमिरेले बताए । महिलाको थर र घरको पूरा ठेगाना खुल्न नसकेको उनको भनाइ छ । उनका श्रीमान विदेशतिर रहेको र एक, डेढ महिनादेखि हराएको भन्ने सुन्नमा आएको प्रहरीको भनाइ छ । शव पोष्टमार्टमका लागि लुम्बिनी प्रादेशिक अस्पतालमा पठाइएको र रिपोर्ट आउन बाँकी छ ।