धनगढीका होटलमा प्रहरीको छापा, २४ जना नियन्त्रणमा

धनगढी, ११ असार । कैलालीको धनगढी उपमहानगरपालिका बजार क्षेत्रका विभिन्न होटल तथा लजमा गरिएको चेकजाँचका क्रममा प्रहरीले २४ जनालाई नियन्त्रणमा लिएको छ।

जिल्ला प्रहरी कार्यालय कैलालीका अनुसार अनैतिक गतिविधि भइरहेको सूचनाका आधारमा सञ्चालन गरिएको अनुगमनमा ११ महिला र १३ पुरुष नियन्त्रणमा परेका हुन्। पक्राउ परेकामध्ये सात जना भारतीय नागरिक पुरुष रहेको प्रहरीले जनाएको छ।

प्रहरीले नियन्त्रणमा लिइएका सबैलाई हिरासतमा राखी आवश्यक अनुसन्धान अघि बढाएको जनाएको छ। घटनाबारे थप विवरण अनुसन्धानपछि सार्वजनिक गरिने बताइएको छ।

प्रहरीले होटल तथा लजमा हुने गैरकानुनी गतिविधि नियन्त्रणका लागि नियमित अनुगमन र कारबाहीलाई निरन्तरता दिने जनाएको छ।