आगामी प्रतिनिधिसभा निर्वाचनको पर्यवेक्षणका लागि ३१ संस्थालाई अनुमति

काठमाडौं, १ पुष । निर्वाचन आयोगले आगामी प्रतिनिधिसभा सदस्य निर्वाचन, २०८२ को पर्यवेक्षणका लागि ३१ वटा संस्थालाई अनुमति दिएको छ। आयोगका अनुसार अनुमति पाउने संस्थामध्ये २७ वटा राष्ट्रिय र ४ वटा अन्तर्राष्ट्रिय संस्था रहेका छन्।

निर्वाचन आयोगले गत कात्तिक ११ गते निर्वाचन पर्यवेक्षण गर्न इच्छुक राष्ट्रिय तथा अन्तर्राष्ट्रिय संस्थाबाट निवेदन आह्वान गरेको थियो।आह्वानअनुसार आयोगमा ४४ वटा राष्ट्रिय र ५ वटा अन्तर्राष्ट्रिय संस्था गरी कुल ४९ संस्थाबाट निवेदन प्राप्त भएको आयोगले जनाएको छ।

पर्यवेक्षणका लागि आवेदन दिएका संस्थामध्ये निर्वाचन पर्यवेक्षण निर्देशिका, २०७९ मा तोकिएका मापदण्ड, आधार र प्रक्रिया पूरा गरेका संस्थालाई मात्रै अनुमति दिने निर्णय गरिएको आयोगका सहसचिव एवं प्रवक्ता नारायणप्रसाद भट्टराईले जानकारी दिनुभयो।

निर्देशिकाबमोजिम आवश्यक कागजात पेश नगरेका संस्थालाई भने ५ दिनभित्र थप कागजात बुझाउन पत्राचार गरिएको उहाँले बताउनुभयो। मागअनुसारका कागजात प्राप्त भएपछि बाँकी संस्थाको हकमा आवश्यक निर्णय गरिने निर्वाचन आयोगले जनाएको छ।