पनौतीमा ५ जनाको मृत्यु, १२ बेपत्ता

काठमाडौं । काभ्रेपलाञ्चोकको पनौती नगरपालिकामा पाँच जनाको मृत्यु हुनुनका साथै १२ जना वेपत्ता भएका छन् । बिहीबार साँझदेखि परेको अविरल वर्षाले ठूलो जनधनको क्षति भएको हो ।

खोपासी जलविद्युत आयोजनको ड्याम क्षेत्रमा रोशी नदीको बाढीले ठूलो क्षति पुगेको छ । रोशीको माथिल्लो क्षेत्रमा रहेको खानी र क्रसरबाट बाढीसँगै बगेर आएको गेग्रानले पनौती नगरपालिका १२ मल्पीभन्दा तलको रोशी बजार पूर्णरूपमा क्षति पुगेको हो ।

खोपासी जदविद्युत् आयोजनाको बाँध क्षेत्रमा रहेको बजारका पक्की घरहरू नै रोशीको बाढीले तहसनहस बनाएको छ । नगरपालिकामा १७ जना बेपत्ता भएकोमा अहिलेसम्म ५ जनाको शव फेला परेको र १२ जनाको खोजी कार्य भइरहेको नगरपालिकाले जनाएको छ ।

नगरपालिकाको १२ नम्बर वडामा ठूलो क्षति पुगेको र रोशीको बजार क्षेत्र रोशी खोलाले बगाएको जनाएको छ । नगरपालिकाभित्र ३ सयभन्दा बढी घरमा बाढी र पहिरोका कारण क्षति पुगेको छ । नगरपालिकाका ११, १ र २ नम्बर वडामा पनि क्षति पुगेको छ ।