- २१ कार्तिक २०८३, शनिबार / Nov 7, 2026
काठमाडौं, १२ साउन । वीरगन्जस्थित नारायणी अस्पतालका सबै चिकित्सकहरूले सामूहिक रूपमा राजीनामा दिएका छन्। अस्पतालमा गत शनिबार भएको तोडफोड तथा चिकित्सक र स्वास्थ्यकर्मीमाथि भएको आक्रमणको विरोधस्वरूप उनीहरूले यो कदम चालेका हुन्।
चिकित्सकहरूको सामूहिक राजीनामासँगै अस्पतालको आकस्मिक सेवा समेत बन्द भएको छ। आन्दोलनरत चिकित्सकहरूले प्रमुख जिल्ला अधिकारी (सीडीओ) र जिल्ला प्रहरी कार्यालय पर्साका प्रहरी उपरीक्षक (एसपी) को राजीनामाको माग गर्दै घटनामा संलग्न आक्रमणकारीलाई तत्काल कानुनी कारबाही गर्नुपर्ने माग गरेका छन्।
नेपाल चिकित्सक सङ्घले पनि वीरगन्जस्थित नारायणी अस्पतालका चिकित्सक तथा स्वास्थ्यकर्मीमाथि भएको साङ्घातिक आक्रमण र जिल्ला प्रशासन कार्यालय पर्सामा भएको दुर्व्यवहारको विरोधमा मंगलबार देशभरका सरकारी, गैरसरकारी तथा निजी अस्पतालहरूमा आकस्मिक बाहेकका सम्पूर्ण स्वास्थ्य सेवा बन्द गर्ने घोषणा गरेको छ।
सङ्घले सोमबार जारी गरेको प्रेस विज्ञप्तिमा देशभर आकस्मिक बाहेकका ओपीडी तथा अन्य नियमित स्वास्थ्य सेवा बन्द रहने जनाएको थियो। चिकित्सकहरूको आन्दोलनका कारण उपचारका लागि अस्पताल पुगेका बिरामीहरू प्रत्यक्ष रूपमा प्रभावित भएका छन्।
