सीमा सुरक्षा बैठकमै बेहोश भएका सशस्त्र प्रहरी एसपी राजेश घिमिरेको निधन

काठमाडौँ, २४ माघ । नेपाल–भारत सीमा सुरक्षा समन्वय बैठकका क्रममा बेहोश भएका सशस्त्र प्रहरी बलका उपरीक्षक (एसपी) राजेश घिमिरेको निधन भएको छ। गएराति उहाँको निधन भएको सशस्त्र प्रहरी बलका केन्द्रीय प्रवक्ता विष्णुप्रसाद भट्टले जानकारी दिनुभयो।

प्रवक्ता भट्टका अनुसार एसपी घिमिरेलाई हृदयाघात भएको थियो। शनिबार दिउँसो मोरङको विराटचोकमा सशस्त्र प्रहरी बल नेपाल र भारतीय सीमा सुरक्षा बल (एसएसबी) का अधिकारीहरू सहभागी डीआईजी तहको समकक्ष समन्वय बैठक चलिरहेको बेला उहाँ अचानक बेहोश भएर ढल्नुभएको थियो।

घटनालगत्तै तत्काल उपचारका लागि विराट टिचिङ अस्पताल लगिए पनि उपचार सफल हुन सकेन। एसपी घिमिरेको शव पोस्टमार्टमका लागि विराट टिचिङ अस्पतालकै शवगृहमा राखिएको सशस्त्र प्रहरीले जनाएको छ। घटनाबारे थप प्रक्रिया अगाडि बढाइएको छ।