- १८ श्रावण २०८३, सोमबार / Aug 3, 2026
काठमाडौं, ४ जेठ । नेपालमा स्वीकृत विदेशी लगानीको तुलनामा वास्तविक रूपमा भित्रिने रकम अत्यन्त कम रहेको पाइएको छ। महालेखापरीक्षक कार्यालयको ३३औँ वार्षिक प्रतिवेदनले वैदेशिक लगानीको प्रतिबद्धता र वास्तविक प्राप्तिबीचको अन्तर बढ्दो क्रममा रहेको देखाएको हो।
प्रतिवेदनअनुसार आर्थिक वर्ष २०८१/८२ मा १ हजार ९ विदेशी लगानीकर्ताबाट ७९ अर्ब ६९ करोड रुपैयाँ बराबरको लगानी प्रस्ताव स्वीकृत भएको थियो। तर, त्यसमध्ये ९७ लगानीकर्ताबाट मात्रै ११ अर्ब ३० करोड रुपैयाँ लगानी नेपाल भित्रिएको छ, जुन कुल स्वीकृत लगानीको १४ प्रतिशत मात्र हो।
महालेखापरीक्षक कार्यालयका अनुसार पछिल्ला वर्षहरूमा विदेशी लगानीको प्रतिबद्धता बढ्दै गए पनि वास्तविक लगानी प्राप्ति भने घट्दो अवस्थामा रहेको छ। आर्थिक वर्ष २०७९/८० मा ३२ अर्ब ४८ करोड रुपैयाँ बराबरको लगानी प्रस्ताव स्वीकृत भएकोमा ९ अर्ब २० करोड रुपैयाँ मात्रै प्राप्त भएको थियो। यो कुल स्वीकृत लगानीको २८ प्रतिशत हो।
त्यस्तै आर्थिक वर्ष २०८०/८१ मा ८१ अर्ब ६९ करोड रुपैयाँ बराबरको लगानी स्वीकृत भएकोमा १० अर्ब २९ करोड रुपैयाँ मात्रै नेपाल भित्रिएको थियो, जुन कुल स्वीकृत लगानीको १३ प्रतिशत हो।
प्रतिवेदनले वैदेशिक लगानीको प्रतिबद्धता व्यवहारमा रूपान्तरण हुन नसकेको उल्लेख गर्दै नीतिगत स्थायित्व कायम गर्न, प्रशासनिक प्रक्रिया सरल बनाउन तथा लगानीमैत्री वातावरण निर्माण गर्न सरकार र सम्बन्धित निकायलाई सुझाव दिएको छ।
