- ४ जेष्ठ २०८३, सोमबार / May 18, 2026
काठमाडौं, ४ जेठ । हाल नेपालमा पश्चिमी वायु तथा स्थानीय वायुको प्रभाव कायम रहेको मौसम पूर्वानुमान महाशाखाले जनाएको छ। महाशाखाका अनुसार अहिले कोशी, बागमती र गण्डकी प्रदेशका थोरै स्थानहरूमा मेघगर्जन र चट्याङसहित हल्कादेखि मध्यम वर्षा भइरहेको छ।
आज कोशी प्रदेशसहित बागमती र गण्डकी प्रदेशका हिमाली तथा पहाडी भू–भागमा सामान्यदेखि आंशिक बदली रहने सम्भावना रहेको छ। कर्णाली प्रदेशको हिमाली भू–भाग तथा मधेश प्रदेशमा पनि आंशिक बदली रहने मौसमविद्ले बताएका छन्।
बाँकी हिमाली, पहाडी तथा तराई भू–भागमा भने मौसम मुख्यतया सफा रहने अनुमान गरिएको छ। महाशाखाका अनुसार आगामी केही घण्टामा कोशी प्रदेशका थोरै स्थानहरू तथा बागमती र गण्डकी प्रदेशका हिमाली र पहाडी भू–भागका एक–दुई स्थानमा मेघगर्जन, चट्याङसहित हल्का वर्षा हुन सक्ने सम्भावना छ।
उच्च हिमाली क्षेत्रमा हल्का हिमपातको सम्भावना समेत रहेको जनाइएको छ। मौसमविद्ले मेघगर्जन र चट्याङको सम्भावना रहेका क्षेत्रमा सतर्कता अपनाउन सर्वसाधारणलाई आग्रह गरेका छन्।
