आठ लाखबढी रकमसहित दुई जनालाई पक्राउ

महोत्तरी । सशस्त्र प्रहरीले स्रोत नखुलेको आठ लाखबढी रकमसहित दुई जनालाई पक्राउ गरेको छ ।

भारतबाट मोटरसाइकलमा नेपाल आउँदै गरेका सम्सी गाउँपालिका ३ बस्ने २८ वर्षीय रमेशकुमार साह र रामगोपालपुर नगरपालिका सहसौलाका ३२ वर्षका अनिल चौधरी पक्राउ परेका हुन् ।

सशस्त्र प्रहरी बल, नेपाल बोर्डर ओउट पोष्ट पोखरभिण्डाबाट खटिएको टोलीले भारतबाट नेपालतर्फ आउँदै गरेको मधेश प्रदेश ०२ ००६प १६२१ नम्बरको मोटरसाइकललाई चेकजाँच गर्ने क्रममा दुवै जनाको साथबाट स्रोत नखुलेको ८ लाख १० हजार ९२० रुपैयाँ बरामद गरेको हो ।

दुवै जनालाई रकमसहित थप अनुसन्धानका लागि जलेश्वर भन्सार कार्यालय बुझाइएको सशस्त्र प्रहरीले जनाएको छ ।