अनियन्त्रित कारले ठक्कर दिँदा कम्तीमा ९ जनाको मृत्यु

एजेन्सी । दक्षिण कोरियाको राजधानी सोलमा अनियन्त्रित कारले ठक्कर दिँदा कम्तीमा ९ जनाको मृत्यु भएको छ भने चारजना घाइते भएका छन् ।

गएराति सोलको एउटा भिडभाडयुक्त क्षेत्रमा अनियन्त्रित कार घुस्दा भएकाे दुर्घटनामा हताहत हुनेको संख्या बढ्न सक्ने आशंका गरिएको छ। उक्त कार ६८ वर्षीय चालकले चलाएका थिए । गलत दिशातिर हुईकिएको कार पहिले दुईवटा अरु गाडीलाई ठक्कर दिएपछि भिडमा उछिट्टिएको बताइएकाे छ । 

दक्षिण कोरियाली समाचार एजेन्सी योनहापका अनुसार दुर्घटनामा ६ जनाको घटनास्थलमै मृत्यु भएको र अन्य ३ जनाको अस्पताल पुर्‍याएपछि मृत्यु भएको थियाे । अन्य देशहरूकाे तुलनामा दक्षिण कोरियामा पैदलयात्रीलाई ठक्कर दिएर हुने दुर्घटनाको संख्या निकै ठूलो रहेकाे छ।