उद्योग विभागले औद्योगिक सम्पत्ति सम्बन्धी मुद्दाको सुनुवाइ ११ कात्तिकबाट सुरु गर्ने

काठमाडौं, ५ कात्तिक । उद्योग विभागले जेन जेड आन्दोलनका कारण रोकिएको औद्योगिक सम्पत्ति सम्बन्धी मुद्दाहरूको सुनुवाइ ११ कात्तिकबाट पुनः सुरु गर्ने निर्णय गरेको छ । विभागले पेटेन्ट, डिजाइन र ट्रेडमार्कसम्बन्धी मुद्दाहरूको सुनुवाइ सोही मितिदेखि पेशी सूचीमा राखेर सोमबारदेखि बिहीबारसम्म नियमित इजलास सञ्चालन गरिने जनाएको छ ।

२४ भदौमा भएको आगजनी घटनाबाट विभागमा ठूलो क्षति पुगेको थियो, जसले कारण सेवाहरू प्रभावित भएका थिए । यद्यपि २१ असोजदेखि अधिकांश सेवा पुनः सञ्चालनमा आएको विभागको भनाइ छ । तर, त्यसयता रोकिएको औद्योगिक सम्पत्तिसम्बन्धी कानुनी कार्यवाही भने सुरु हुन सकेको थिएन । अब भने ११ कात्तिकबाट यी मुद्दाहरूको नियमित सुनुवाइ सुरु हुने भएपछि सेवा प्रभावित भएकाहरूलाई राहत हुने अपेक्षा गरिएको छ ।

विभागका अनुसार, पेटेन्ट दर्ता, डिजाइन संरक्षण, र ट्रेडमार्क दर्ता/विवादसम्बन्धी मुद्दाहरू प्राथमिकताका साथ अगाडि बढाइनेछ ।