रानिकोटमा अवस्थित प्राकृतिक बाघ भैरव जात्रा बैशाख २९ गते भव्य रूपमा मनाइने

भक्तपुर । काभ्रेपलाञ्चोक र भक्तपुर जिल्लाको सीमानामा रहेको ऐतिहासिक तथा धार्मिक बाघ भैरवको जात्रा आउँदो सोमबार, बैशाख २९ गते, भव्य रूपमा आयोजना हुने भएको छ। नेपाल संवत ११४५ को बछलाथ्व पुन्हि पर्वको अवसरमा आयोजना हुने जात्रा सांस्कृतिक, धार्मिक र सामाजिक दृष्टिकोणले अत्यन्तै महत्वपूर्ण मानिन्छ।

जात्रामा सहभागिता जनाउन सम्पूर्ण श्रद्धालु, समाजसेवी, राजनैतिक, धार्मिक तथा सांस्कृतिक व्यक्तित्वहरूलाई आयोजकले निमन्त्रणा गरेका छन्। परम्परागत नेवारी बाजा-धिमे, बासुरी, झाँकी तथा पञ्चेबाजाको संगीतमय प्रस्तुतिले जात्रालाई झनै जीवन्त बनाउनेछ। बिहान १० बजेदेखि सुरु हुने कार्यक्रम साँझसम्म निरन्तर चल्नेछ।

जात्राको प्रमुख व्यवस्थापनमा फुल्चोकी नेवा कल्याण समाज रहेको छ। नेवा देय दबु पनौती–१ सह–व्यवस्थापनमा रहँदा, फुल्चोकी धिमे तथा बासुरी खलले सांस्कृतिक प्रस्तुतिमा सहयोग पुर्‍याउनेछन्। पनौती वडा नं १ कार्यालय जात्राको मुख्य सहयोगी संस्थाका रूपमा रहनेछ।

धार्मिक आस्थाको केन्द्र र सांस्कृतिक गौरवको परिचायक यो जात्राले रानीकोटको मौलिक पहिचानलाई झल्काउने विश्वास आयोजकहरूले व्यक्त गरेका छन्। स्थानीयवासीको सक्रिय सहभागिता र श्रद्धालुहरूको उपस्थितिले जात्रालाई अझ भव्य बनाउने अपेक्षा गरिएको छ।