- २६ असार २०८३, शुक्रबार / Jul 10, 2026
काठमाडौँ, ३१ जेठ । बाग्लुङमा भएको जीप दुर्घटनामा मृत्यु हुनेको संख्या चार पुगेको छ भने घाइतेको संख्या १० पुगेको छ। दुर्घटना ढोरपाटन नगरपालिका–५, अस्तुमा हिजो बेलुका भएको हो।
जिल्ला प्रहरी कार्यालयका प्रहरी निरीक्षक केशव थापाका अनुसार, मृत्यु हुनेहरूमा ७० वर्षीय नरबहादुर कार्की, ७५ वर्षीया भीमकुमारी बुढा, मनकुमारी थापा र २१ वर्षीया टीकाकुमारी कुँवर छन्। दुर्घटनामा घाइते भएका चालक २७ वर्षीय गोविन्द थापासहित १० जनाको उपचार जारी छ।
घाइतेमध्ये आठ जनाको मणिपाल अस्पताल पोखरामा र दुई जनाको मिसन अस्पताल पाल्पामा उपचार भइरहेको छ भने दुई जना उपचारपछि डिस्चार्ज भइसकेका छन्।
दुर्घटना भएको जीप लुम्बिनी प्रदेश नम्बर ०१, च १७७५ नम्बरको रहेको थियो र यसमा चालकसहित १६ जना सवार थिए। जीप बुर्तिबाङ बजारबाट ढोरपाटन नगरपालिका–५ चौरतर्फ जाँदै थियो। प्रहरीले दुर्घटनाको कारणबारे थप अनुसन्धान गरिरहेको छ।
