- ३० चैत्र २०८२, सोमबार / Apr 13, 2026
काठमाडौं, १ फागुन । आगामी फागुन २१ गते हुने निर्वाचनका लागि जिल्लाहरूमा मतपत्र पठाउने काम सुरु भएको छ। निर्वाचन आयोगले कर्णाली प्रदेशका विभिन्न जिल्लामा मतपत्र ढुवानी थालेको हो।
आयोगका अनुसार कर्णाली प्रदेशका १० जिल्लाका १२ निर्वाचन क्षेत्रमा मतपत्र पठाउन थालिएको छ। मतपत्र छपाइ सम्पन्न भएका सल्यान, रुकुमपश्चिम, डोल्पा, मुगु, हुम्ला, कालिकोट, जुम्ला, जाजरकोट, दैलेख र सुर्खेत जिल्लाका निर्वाचन क्षेत्रमा ढुवानी सुरु गरिएको आयोगका सहायक प्रवक्ता प्रकाश न्यौपानेले जानकारी दिनुभयो।
यस्तै, हालसम्म ५८ जिल्लाका १२४ निर्वाचन क्षेत्रको मतपत्र छपाइ सम्पन्न भएको आयोगले जनाएको छ। कुल १ करोड ५७ लाख ७८ हजार मतपत्र छपाइ सकिएको छ। आयोगका अनुसार हालसम्म १४ हजार ३४१ बाकस मतपत्र प्याकिङ भइसकेको छ। दैनिक करिब १ हजार बाकस मतपत्र प्याकिङ भइरहेको छ भने १३ देखि १५ लाखसम्म मतपत्र छपाइ भइरहेको छ।
प्रतिनिधिसभा सदस्य निर्वाचनका लागि जनक शिक्षा सामग्री केन्द्र लिमिटेड सानोठिमीमा मतपत्र छपाइको काम जारी छ।यसैबीच, आयोगले आगामी ३ गतेदेखि देशभर मतदाता शिक्षा कार्यक्रम सुरु गर्ने भएको छ। विगतकै निरन्तरताअनुसार करिब २५ करोड रुपैयाँ खर्चेर मतदाता शिक्षा सञ्चालन गरिनेछ।
मतदाता शिक्षाका लागि आयोगले तयार पारेको विशेष कार्यक्रमअनुसार देशभरका सबै वडामा एक–एक जना योग्य तथा अनुभवी स्वयंसेवक परिचालन गरिने आयोगका सहायक प्रवक्ता कुलबहादुर जिसीले जानकारी दिनुभयो।
