पोखरामा दुई सातापछि फोहर उठाउन सुरु

काठमाडौं, १ फागुन । पर्यटकीय राजधानी पोखरामा दुई सातादेखि उठ्न नसकेको फोहर उठाउन सुरु गरिएको छ। महानगरपालिकाले हिजो साँझदेखि फोहर सङ्कलन कार्य पुनः सुरु गरेको हो।

बजार क्षेत्रका सडक छेउ, चोक र मुख्य मार्गमा लामो समयदेखि फोहर नउठ्दा पोखरा दुर्गन्धित बनेको थियो। पोखरा–३२ लामेआहालमा रहेको अस्थायी फोहर व्यवस्थापन केन्द्र भरिएपछि फोहर उठ्न नसकेको जनाइएको छ।

फोहर व्यवस्थापनका लागि महानगरपालिकाले विभिन्न स्थानमा वैकल्पिक जमिन खोजी गरे पनि सफल हुन सकेको थिएन। सडक किनार, चोक, बिजुलीका पोल वरिपरि मात्र नभई मुख्य सडकमै फोहर थुप्रिन थालेपछि बजार क्षेत्रमा दुर्गन्ध फैलिएको थियो।

महानगर प्रमुख धनराज आचार्यले हिजो साँझदेखि क्रमशः फोहर सङ्कलन गर्ने गाडी सञ्चालनमा आएको जानकारी दिनुभयो। उहाँले सार्वजनिक बाटो तथा खुला स्थानमा फोहर विसर्जन नगर्न सर्वसाधारणलाई आग्रहसमेत गर्नुभएको छ।