- २६ असार २०८३, शुक्रबार / Jul 10, 2026
काठमाण्डौ, ३१ जेठ । चालू आर्थिक वर्षको १० महिनामा वाणिज्य बैंकहरूले ४७ अर्ब ७९ करोड ४७ लाख रुपैयाँ खुद नाफा कमाएका छन् । यो नाफा गत वर्षको सोही अवधिको तुलनामा १.६७ प्रतिशतले कम हो ।
गत वर्षको वैशाखसम्म बैंकहरूले ४८ अर्ब ६० करोड ६७ लाख रुपैयाँ नाफा कमाएका थिए । चालू आर्थिक वर्षमा १० वटा बैंकको नाफा बढेको छ भने १० वटाको नाफा घटेको छ । नेपाल बैंकको नाफा गत वर्ष ५९ करोड ३ लाख रुपैयाँबाट चालू वर्षको वैशाखसम्ममा ३ अर्ब २८ करोड ८८ लाख रुपैयाँ पुगेको छ । नेपाल इन्भेष्टमेन्ट मेगा बैंकले ३३ प्रतिशतले नाफा वृद्धि गर्दै ५ अर्ब २ करोड रुपैयाँ कमाएको छ ।
एभरेष्ट बैंकको नाफा ३१ प्रतिशतले बढेर ३ अर्ब ९० करोड रुपैयाँ र ग्लोबल आईएमई बैंकको नाफा लगभग ३० प्रतिशतले वृद्धि भई ५ अर्ब ३५ करोड पुगेको छ ।माछापुच्छ्रे बैंकको नाफा १८.७ प्रतिशतले बढेर १ अर्ब ३१ करोड रुपैयाँ, लक्ष्मी सनराइज बैंकको नाफा १०.२ प्रतिशतले बढेर २ अर्ब १५ करोड, सानिमा बैंकको नाफा ७.१ प्रतिशतले बढेर १ अर्ब ८७ करोड पुगेको छ । एनएमबी बैंक, नबिल बैंक र सिद्धार्थ बैंकको पनि नाफामा वृद्धि देखिएको छ ।
तर केही बैंकहरूको नाफा भने घटेको छ । एनआईसी एशिया बैंकको नाफा ७७.१ प्रतिशतले घटेर ४७ करोड ८७ लाख, हिमालयन बैंकको ६९.३ प्रतिशतले घटेर ६८ करोड ३४ लाख र कुमारी बैंकको ६६.३ प्रतिशतले घटेर ४८ करोड १९ लाख रुपैयाँमा सीमित भएको छ ।
कृषि विकास बैंकको नाफा ३५.७ प्रतिशतले घटेर १ अर्ब ७३ करोड ३८ लाख रुपैयाँ, राष्ट्रिय वाणिज्य बैंकको नाफा ३०.९ प्रतिशतले घटेर १ अर्ब ७७ करोड रुपैयाँमा सीमित भएको छ । सिटिजन्स बैंक, प्रभु बैंक, प्राइम कमर्सियल बैंक, स्ट्यान्डर्ड चार्टर्ड बैंक र नेपाल एसबीआई बैंकको नाफा पनि केही हदसम्म घटेको छ ।
