- २६ असार २०८३, शुक्रबार / Jul 10, 2026
काठमाडाैं ३१ जेठ । इरान र इजरायलबीच बढ्दो तनावले अन्तर्राष्ट्रिय समुदायलाई सतर्क बनाएको छ। संयुक्त राष्ट्र सुरक्षा परिषद्को बैठकमा शनिबार चीनका राजदूत फु कोङले इजरायलको कडा निन्दा गर्दै इरानको सार्वभौमसत्ता उल्लंघन भएको बताए।
उनले यो अवस्था आणविक सम्झौतामा नकारात्मक प्रभाव पार्ने चिन्ता व्यक्त गरे र इजरायललाई सबै सैन्य कारबाही तुरुन्तै बन्द गर्न अपील गरे। फु कोङले आणविक अप्रसार सन्धि (एनपीटी) को सम्मान गर्दै इरानको शान्तिपूर्ण आणविक ऊर्जाको प्रयोग गर्ने अधिकारलाई जोड दिएका छन्।
चीन र इरानबीच ऊर्जा र विकास परियोजनामा घनिष्ठ साझेदारी रहेको समेत उनले बताए। गत मार्चमा चीनले इरान र रूसका उपविदेशमन्त्रीहरूलाई बेइजिङमा बोलाएर आणविक मुद्दा र प्रतिबन्ध हटाउने विषयमा छलफल गरेको थियो।
अमेरिकी सुरक्षा अधिकारी म्याककोय पिटले इजरायलले इरानमाथि आक्रमण गर्नुअघि अमेरिकालाई जानकारी गराएको तर संयुक्त राज्यले उक्त आक्रमणमा कुनै सैन्य संलग्नता नभएको स्पष्ट पारे। उनले भने, “हाम्रो मुख्य प्राथमिकता अमेरिकी नागरिक, कर्मचारी र सैनिकहरूको सुरक्षा हो।” साथै, उनले इरानलाई वार्ताको लागि तयार हुन आग्रह गर्दै यस मुद्दाको शान्तिपूर्ण समाधानको आशा व्यक्त गरे।
अमेरिकी राष्ट्रपति डोनाल्ड ट्रम्पले पनि इरानलाई आफ्नो आणविक कार्यक्रम सम्झौतामा आउन आग्रह गर्दै नआएमा इजरायलले थप कडा कारबाही गर्न सक्ने चेतावनी दिएका छन्। ट्रम्पले भनेका छन्, “इरानले वार्ताको विकल्प खोज्नुपर्छ नभए थप गम्भीर परिणाम भोग्नुपर्नेछ।”
यो तनावले मध्यपूर्व क्षेत्रमा सुरक्षा चुनौती थप बढाएको छ र आगामी दिनहरूमा अन्तर्राष्ट्रिय कूटनीतिक पहलहरू कसरी अघि बढ्छन् भन्नेमा सबैको ध्यान केन्द्रित छ।
