- २३ बैशाख २०८३, बुधबार / May 6, 2026
बारा, १५ मंसिर । बारामा जनप्रतिनिधि, प्रहरी र प्रशासनको मिलेमतोमा माटो तस्करी भयावह रूपमा बढेको छ । यसका कारण पालिकाहरूले हरेक वर्ष करोडौँ रुपैयाँ राजस्व गुमाइरहेका छन् । विशेष आर्थिक क्षेत्र प्राधिकरण (सेज) सिमरामा निर्माणाधीन उद्योगहरूका लागि अवैध रूपमा दैनिक सयौँ टिपर माटो ओसारपसार भइरहेको पाइएको छ ।
सेजभित्र रहेका नेपाल एग्रो टुल्स प्रालि र सिमरा गंग आर युआन बायोलोजिकल टेक्नोलोजी प्रालिले संरचना निर्माणका लागि ठूलो मात्रामा माटो प्रयोग गरिरहेका छन् । नेपाल एग्रो टुल्सका सुपरभाइजर रामोद कुशवाहाका अनुसार करिब २ बिघा ५ कट्ठा जग्गाको खाडल पुर्न २ सयभन्दा बढी टिपर माटो वीरगन्ज महानगरपालिका ३२ को चोर्नीबाट ल्याइएको हो ।
यस्तै , चिनियाँ लगानीमा निर्माण भइरहेको सिमरा गंग आर युआन टेक्नोलोजीले ४ सयभन्दा बढी टिपर माटो प्रयोग गरिसकेको छ । तर यी उद्योगहरूले माटो कहाँबाट ल्याइरहेका छन् भन्नेबारे सम्वन्धित निकाय बेखबर छन् ।
जीतपुर सिमरा उपमहानगर अनुसार माटो वीरगन्ज , पर्सागढी , कलैया , कोल्हवी तथा वन क्षेत्रका खोलानाला र सार्वजनिक जग्गाबाट अवैध रूपमा काटिएको देखिन्छ । कर कार्यान्वयन कडा भएपछि छिमेकी पालिकाहरूबाट तस्करी गरेर सेजमा माटो पुर्याउने क्रम बढेको नगरप्रमुख राजन पौडेल बताउँछन् ।
यता , प्रहरी प्रशासन भने सयौँ टिपर माटो दैनिक गुडिरहँदा पनि बेखबर झैँ देखिएको छ । जीतपुर सिमरामाले नियन्त्रणमा लिएको एक टिपरपछि मात्र प्रहरी सक्रिय भएको बताइएको छ ।
कानुन अनुसार माटो उत्खनन गर्न प्रारम्भिक वातावरणीय अध्ययन (आईईई) र कर बुझाइ सिफारिस आवश्यक हुन्छ । तर वीरगन्ज–३२ का वडाध्यक्ष रियाज अहमदले कर नबुझाई सप्लायर्सलाई सिफारिस दिएको आरोप छ ।
प्रदेश र स्थानीय तहले माटोमा कर तोके पनि ८ वर्षदेखि वीरगन्ज महानगरले एक रुपैयाँ पनि राजस्व उठाउन नसकेको पाइएको छ ।
जीतपुर सिमराले यसबारे पत्राचार गर्दै अवैध माटो उत्खनन रोक्न माग गरेको छ । तर राजनीतिक हस्तक्षेपका कारण दुई वर्षअघि सार्वजनिक जग्गाको माटो चोरी प्रकरणमा समेत कारबाही अघि बढ्न नसकेको नगरप्रमुख पौडेलको भनाइ छ ।
हाल अख्तियार दुरुपयोग अनुसन्धान आयोगले केही घटनामा अनुसन्धान गरिरहेको छ तर माटो तस्करी अझै पनि रोकिएको छैन ।
