- ३१ भाद्र २०८३, बुधबार / Sep 16, 2026
बर्दिया, ११ जेठ । बर्दियाको ठाकुरबाबा नगरपालिका तथा आसपासका क्षेत्रहरूमा हिजो दिउँसो आएको हावाहुरीले जनधनको क्षति पुर्याएको छ। ठाकुरबाबा नगरपालिका–३ नेउलापुर गाउँमा ठूलो रुख घरमाथि ढल्दा दुई बालक घाइते भएका छन्।
स्थानीय रामकुमार थारुको घरमाथि रहेको सालको रुख हावाहुरीले ढल्दा घर पूर्ण रूपमा क्षति भएको र उनका दुई छोराहरू ५ वर्षीय आदित्य थारु र १० वर्षीय अमित थारु घाइते भएको स्थानीयले जानकारी दिए।
घाइतेमध्ये अमितको ठाकुरबाबा नगर अस्पतालमा उपचार भइरहेको छ भने अदित्यलाई थप उपचारका लागि नेपालगञ्ज पठाइएको छ। उनीहरूको अवस्था गम्भीर नभएको तर निगरानीमा राखिएको स्थानीयले बताएका छन्।
स्थानीय बासिन्दाहरूले हावाहुरीका कारण अन्य स्थानहरूमा पनि सामान्य क्षति पुगेको जनाएका छन्। प्रभावित परिवारलाई तत्काल राहत उपलब्ध गराउन स्थानीय सरकारलाई आग्रह गरिएको छ।
