- २४ आश्विन २०८३, शनिबार / Oct 10, 2026
काठमाडौं, ११ जेठ । युक्रेनका विभिन्न सहरमा भएको भीषण रुसी हवाई आक्रमणमा कम्तीमा १३ जनाको मृत्यु भएको छ भने ५६ जना घाइते भएका छन्।
बीबीसीले युक्रेनी वायु सेनालाई उद्धृत गर्दै जनाएअनुसार, रुसले राजधानी कीएभसहित विभिन्न क्षेत्रमा २ सय ५० वटा ड्रोन र १४ वटा ब्यालेस्टिक क्षेप्यास्त्र प्रहार गरेको थियो। ती आक्रमणहरू मुख्यतया आवासीय क्षेत्र, संरचना र सामान्य जनजीवनलाई लक्षित गरिएको बताइएको छ।
प्रहरी र उद्धार टोलीहरूका अनुसार, थुप्रै घरहरूमा आगलागी भएको छ भने केही संरचना पूर्ण रूपमा ध्वस्त भएका छन्। घटनास्थलमा अहिले पनि उद्धार कार्य जारी छ।
आक्रमणपछि युक्रेनका राष्ट्रपति भोलोदिमिर जेलेन्स्कीले सामाजिक सञ्जाल X (पूर्व ट्विटर) मार्फत प्रतिक्रिया जनाउँदै भनेका छन्, “यस्ता आक्रमणहरूले पुष्टि गर्छन् कि युद्ध लम्बिनुको मुख्य कारण रुस नै हो।” उनले अन्तर्राष्ट्रिय समुदायलाई अझै दृढताका साथ युक्रेनको साथ दिन आह्वान गरेका छन्।
युक्रेन–रुस युद्ध अझै पनि तीव्र रूपमा जारी रहँदा, सर्वसाधारण नागरिकहरू सबैभन्दा बढी प्रभावित हुँदै आएका छन्।
