प्रतिवेदनका आधारमा गृह प्रशासन सुधारको मार्गचित्र तयार गर्ने

काठमाण्डौ । सुझाव समितिले उपप्रधान एवम् गृहमन्त्री रवि लामिछानेलाई प्रतिवेदन पेस गरेको छ। गृह मन्त्रालयअन्तर्गतका निकायका सेवालाई प्रभावकारी बनाउन गठित सुझाव समितिले शुक्रबार प्रतिवेदन पेस गरेको हो । अध्ययन समिति तथा विषयगत उपसमितिलाई प्राप्त कार्यादेश अनुरुप विद्यमान समस्याको पहिचान गरी मन्त्रालयको कार्यसम्पादन क्षमता बढाउन तथा मन्त्रालयले प्रदान गर्ने सेवालाई थप प्रभावकारी बनाउनका लागि सुझाव दिन समिति बनाइएको थियो ।

मन्त्रालयअन्तर्गतका निकायको सेवालाई थप प्रभावकारी बनाउन सुझावसहितको प्रतिवेदन तयार पार्न २०८० साल कात्तिकमा पूर्व मुख्यसचिव लिलामणि पौड्यालको संयोजकत्वमा गठित समितिले गृहमन्त्री लामिछानेलाई प्रतिवेदन बुझाएको हो । कार्यादेशअनुसार समितिले मन्त्रालय र मातहत निकायको कार्य सम्पादन सुधार गर्न कर्मचारीको कार्य क्षमता तथा वृत्ति विकास र सङ्गठन तथा व्यवस्थापनका विषय समावेश गरिएको प्रतिवेदनमा तत्काल र दीर्घकालमा लागू गर्न सकिने कार्य योजनाहरु पनि प्रस्तुत गरिएको छ ।

गृहमन्त्री लामिछानेले प्रतिवेदनका आधारमा गृह प्रशासन सुधारको मार्गचित्र तयार गर्ने र त्यसै अनुसार सुधारका कार्यहरु अघि बढाउने बताएका छन् । समितिलाई शान्ति सुव्यवस्था, अपराध अनुसन्धान, सस्थागत पुनसंरचना, कर्मचारीको कार्य क्षमता वृद्धि, कार्य सम्पादन मापन, नीतिगत तथा कानुनी सुधार, मन्त्रालयअन्तर्गतका निकायहरुको संस्थागत सुदृढीकरण, सेवा प्रवाहमा सुधार, विपद् व्यवस्थापन, राष्ट्रिय परिचयपत्र व्यवस्थापन, सीमा सुरक्षा र राजस्व चुहावट नियन्त्रण लगायतका विषयहरु समावेश गरी प्रतिवेदन पेस गर्ने कार्यादेश दिइएको थियो ।