भक्तपुर, ८ असार । भक्तपुर नगरपालिकाको आर्थिक वर्ष २०८२/८३ का लागि कुल रु. २ अर्ब ४७ करोड ३१ लाख ११ हजार बराबरको अनुमानित बजेट प्रस्तुत गरिएको छ । नगरप्रमुख सुनिल प्रजापतिको अध्यक्षतामा बसेको अठारौं नगरसभाको बैठकमा उपप्रमुख रजनी जोशीले बजेट प्रस्तुत गर्नुभयो।
बजेटमा ६१.६७ प्रतिशत चालू खर्च, ३२.५४ प्रतिशत पुँजीगत खर्च र ५.७८ प्रतिशत वित्तीय व्यवस्थापनका लागि विनियोजन गरिएको छ। शिक्षा क्षेत्रमा रु. ५४ करोड ४ लाख ६३ हजार (कुल बजेटको २१.८५%) र स्वास्थ्य क्षेत्रमा रु. १० करोड ३७ लाख ५० हजार विनियोजन गरिएको छ। ख्वप अस्पतालको स्तरोन्नति तथा खँचापुखु स्वास्थ्य चौकी निर्माण पनि आगामी वर्षको प्राथमिकतामा परेको छ।
नगरको सांस्कृतिक सम्पदा संरक्षणतर्फ रु. १२ करोड ६८ लाख ५० हजार विनियोजन गरिएको छ। यस अन्तर्गत थन्थु दरबार, इखालाछी मठ, लायकु पाहाँ छेँ, सिद्धपोखरी, दहि विनायक द्योछेँ लगायतका स्थलहरूको पुनःनिर्माणको बजेट व्यवस्था गरिएको छ। कृषि क्षेत्रमा वधशाला, शीत भण्डार गृह, र तरकारी बजारको लागि बजेट छुट्याइएको छ। खानेपानी वितरण, वातावरण तथा सरसफाइ (रु. २० करोड २२ लाख), र पर्यटन प्रवर्द्धन (रु. ४ करोड ९० लाख) पनि बजेटमा प्राथमिकतामा छन्।
सार्वजनिक संरचना विकास अन्तर्गत अरनिको सभाभवन, बहुउद्देश्यीय भवन, पार्किङ स्थल, र जग्गा एकीकरणका लागि बजेट विनियोजन गरिएको छ। खेलकुद क्षेत्रका लागि विभिन्न मैदान र तालिम केन्द्रमा लगानीको व्यवस्था गरिएको छ।
दीर्घरोगीहरूको उपचारमा आर्थिक सहायता निरन्तरता, सीपमूलक तालिम, र विविध योजनाहरूका लागि रु. ९ करोड १४ लाख विनियोजन गरिएको छ। नगरसभामा आर्थिक विधेयक २०८२ तथा विनियोजन विधेयक २०८२ पनि उपप्रमुख जोशीले प्रस्तुत गर्नुभएको छ।
