- ५ असार २०८३, शुक्रबार / Jun 19, 2026
भक्तपुर, २७ साउन । अन्तर्राष्ट्रिय युवा दिवसको अवसरमा भक्तपुर नगरपालिका वडा नं. १ दुधपाटीस्थित भाजु पोखरी परिसरमा आयोजित छिकोङ शारीरिक व्यायामको बृहत प्रदर्शनी सम्पन्न भएको छ। भक्तपुर नगरपालिकाका १० वटै वडाका छिकोङ प्रशिक्षार्थीहरूले एकैसाथ शारीरिक अभ्यास गरेका हुन ।
कार्यक्रममा प्रमुख अतिथि नेपाल मजदुर किसान पार्टीका सचिव तथा संघीय सांसद प्रेम सुवालले नियमित व्यायाम र स्वस्थ जीवनशैलीले शारीरिक स्फूर्ति र रोग प्रतिरोधात्मक क्षमता बढाउने बताए। उनले युवाहरूलाई स्वदेशमै रोजगारीको अवसर सिर्जना गर्न र राष्ट्र निर्माणमा सक्रिय भूमिका निर्वाह गर्न आग्रह गरे।
भक्तपुर नगरपालिकाका प्रमुख सुनिल प्रजापतिले नगरबासीलाई स्वस्थ र तन्दुरुस्त बनाउन खेलकुद क्षेत्रलाई प्राथमिकतामा राखिएको बताए। वडा नं. १ का वडाध्यक्ष श्यामकृष्ण खत्रीले युवालाई राजनीतिक र सामाजिक रूपमा सक्रिय बनाउनुपर्नेमा जोड दिए।
बृहत प्रदर्शनीमा कार्यपालिका सदस्य सञ्जना त्वाती र सुनिता अवाललगायत वक्ताहरूले पनि शारीरिक अभ्यासको महत्वबारे प्रकाश पारे। कार्यक्रममा करिब ५०० भन्दा बढी प्रशिक्षार्थीको सहभागिता थियो।
