रवि लामिछानेलाई थुनामै राख्ने अदालतको आदेश

बुटवल, २६ साउन । राष्ट्रिय स्वतन्त्र पार्टी (रास्वपा)का सभापति रवि लामिछानेलाई थुनामै राख्ने आदेश जिल्ला अदालत रुपन्देहीले जारी गरेको छ । जिल्ला अदालत रुपन्देहीका न्यायाधीश नारायणप्रसाद सापकोटाको इजलासले सोमबार लामिछानेलाई पुर्पक्षका लागि कारागारमै राख्ने आदेश दिएको हो ।

लामिछाने बुटवलको सुप्रीम सहकारी ठगी प्रकरणमा गत चैत २५ देखि रुपन्देही कारागारमा रहेका छन् । लामिछानेले आफू सहकारी ठगीमा संलग्न नरहेको दाबी गर्दै बचतकर्ताको रकम फिर्ता गर्ने सुनिश्चितता आफूले नै गर्न चाहेको बताएका थिए । उनले आफ्नो भागको ठगी रकम बराबरको २ करोड ७४ लाख ८४ हजार रुपैयाँको बैंक जमानतसहित अदालतमा निवेदन दिएका थिए ।

यो निवेदनमा सुनुवाइका लागि १० नम्बर न्यायाधीश नारायण सापकोटाको इजलासमा परेको थियो । तर, अदालतले जमानत स्वीकार नगरी उनलाई थुनामै राख्ने आदेश सुनाएको हो । यसअघि, बुटवलस्थित उच्च अदालत तुलसीपुरको इजलासले गत चैत २२ गते लामिछानेलाई पुर्पक्षका लागि थुनामा पठाउने आदेश दिएको थियो, जसलाई सर्वोच्च अदालतले समेत सदर गरिसकेको छ ।