- ३१ आश्विन २०८३, शनिबार / Oct 17, 2026
भक्तपुर, ३ असार । भक्तपुरको सल्लाघारीस्थित एक क्याफेबाट सशस्त्र प्रहरीले ५.४ किलोग्राम लागू औषध ‘पोल्याण्ड’ (एक प्रकारको चरेश) सहित तीन युवालाई पक्राउ गरेको छ । सशस्त्र इन्क्टेलिजेन्स ब्युरोको विशेष सूचनाका आधारमा सशस्त्र प्रहरी बल, नेपाल नम्बर २२ गण मुख्यालय गृहेश्वरी मातहतको औद्योगिक सुरक्षा बेस, ब्यासी भक्तपुरबाट खटिएको टोलीले प्रकाउ गरेकाे हाे ।
भक्तपुर नगरपालिका–१, मुपुच्व गणेश मन्दिर नजिकको क्याफेमा लागू औषधको कारोबार भइरहेको भन्ने सूचना प्राप्त भएपछि सशस्त्र प्रहरीको सात सदस्यीय टोली खटिएको थियो । प्रहरीले उनीहरूलाई रंगेहात पक्राउ गरेको जनाएको छ । पक्राउ पर्नेहरूमा धादिङको गल्छी गाउँपालिका–५ निवासी २० वर्षीय सुमन तामाङ, २३ वर्षीय सुरवीर तामाङ र २३ वर्षीय कमल तामाङ छन् । उनीहरू सवारीसाधन र लागू औषधसहित पक्राउ परेका हुन् ।
बरामद सामग्रीहरू:
लागू औषध ‘पोल्याण्ड’ (चरेश): ५.४ केजी
मोटरसाइकल (बा ७५ प २२ नम्बरको बजाज २२०): १ थान
एन्ड्रोइड मोबाइल: ३ थान
नगद रकम: रु. ६,४००
पक्राउ परेका तीनै जनालाई बरामद सामग्रीसहित थप अनुसन्धान तथा कानुनी कारबाहीका लागि जिल्ला प्रहरी परिसर, भक्तपुरमा बुझाइएको सशस्त्र प्रहरीले जानकारी दिएको छ।
