- १५ जेष्ठ २०८३, शुक्रबार / May 29, 2026
भक्तपुर, २३ कार्तिक । भक्तपुर अस्पतालले कर्मचारी प्रेस डटकम अनलाइनमा प्रकाशित ‘स्पेक टकको सिन्डिकेट : स्वास्थ्य सचिव डा. सुमित्राद्वारा करोडौँको भ्रष्टाचार आरोपसहित अख्तियारमा उजुरी’ शीर्षकको समाचारप्रति आपत्ति जनाएको छ । अस्पतालले उक्त समाचारलाई पूर्णतः भ्रामक, कपोलकल्पित र तथ्यहीन भन्दै खण्डन गरेको हो।
खण्डनपत्रमा अस्पतालका कर्मचारी समेत रहेका दिपेश खड्काले उक्त समाचारमा उल्लेख गरिएको स्वास्थ्य मन्त्रालयका सचिव (पूर्व मेसु) डा. सुमित्रा गौतम सम्बन्धी आरोपहरू झुठा रहेको स्पष्ट पारेका छन्। अस्पतालका अनुसार अख्तियारमा परेको उजुरीको हवाला दिँदै प्रकाशित समाचारमा उल्लेख गरिएझैं स्पेक लक र सप्लायर्ससँगको मिलेमतो, मेशीन खरिदमा भ्रष्टाचार र आन्तरिक हेराफेरी भएको भन्ने दाबीहरू निराधार छन्।
खड्काले खण्डनपत्रमा स्पष्ट पारेका छन् “भक्तपुर अस्पतालले कुनै पनि उपकरण खरिदमा अनियमितता गरेको छैन, अस्पताल वा सचिव डा. गौतममाथि लगाइएका आरोपहरू केवल चरित्रहत्या गर्ने उद्देश्यले फैलाइएका हुन्।”
उनले थपे “अख्तियार अनुसन्धान आयोग वा कुनै अन्य सरकारी निकायबाट छानबिन भएमा हामी पूर्ण सहयोग गर्नेछौं, तर कुनै पनि किसिमको गैरकानुनी कार्य भएको छैन।”
खण्डनपत्रमा जनाइएअनुसार, डा. सुमित्रा गौतमले विभिन्न ठाउँमा उत्कृष्ट कार्यसम्पादनका आधारमा पुरस्कार प्राप्त गरेको र उनीविरुद्ध गरिएको समाचारले व्यक्तिको इमान र प्रतिष्ठामाथि प्रहार गरेको आरोप लगाइएको छ।
भक्तपुर अस्पतालले सार्वजनिक रूपमा जनाएको छ “देश र बिरामीलाई हानि पुग्ने कुनै पनि कार्य गरिएको छैन, गलत समाचारमार्फत प्रतिष्ठा धूमिल गर्ने प्रयास गरिएको छ, जसप्रति अस्पताल गम्भीर आपत्ति जनाउँछ।”
