- १७ असार २०८३, बुधबार / Jul 1, 2026
भोजपुर, २२ असार । भोजपुरमा एक व्यक्तिले आफ्नै ससुराली पक्षका चार जनाको धारिलो हतियार प्रयोग गरी हत्या गरेका छन् । रामप्रसाद राई गाउँपालिका–२ धोदलेखानीमा भएको यस घटनाले स्थानीय समुदायलाई स्तब्ध बनाएको छ ।
जिल्ला प्रहरी कार्यालय भोजपुरका अनुसार हत्या गर्ने व्यक्ति भोजपुर नगरपालिका–२ हेलौछाका राजेन्द्र राई हुन् । उनले आफ्नी १६ वर्षीया श्रीमती, १० वर्षे साला, सासु मन्जु गिरी र ससुरा बेलबहादुर गिरी (६८ वर्ष)लाई धारिलो हतियारले आक्रमण गरी ज्यान लिएका हुन् । प्रहरी कार्यालय भोजपुरले जनाएअनुसार, राजेन्द्र राईले शनिबार राति १:१५ बजे प्रहरी कन्ट्रोल रुममा फोन गरी, “ममाथि चक्कु प्रहार भएकाले मैले मान्छे मारेको छु, मलाई पक्रन आउनुस्,” भनी खबर गरेका थिए ।
घटनापछि अस्थायी प्रहरी चौकी ओख्रे र जिल्ला प्रहरी कार्यालयबाट टोली घटनास्थलतर्फ खटिएको थियो । प्रहरी घटनास्थलमा पुग्दा चारै जनाको शव फेला परेको थियो । राजेन्द्र राई भने घटनास्थलबाट करिब ४–५ किलोमिटर टाढा रामप्रसाद राई गाउँपालिका–१ हर्बुभञ्ज्याङ भन्ने स्थानमा घाइते अवस्थामा भेटिएका थिए । उनको पेटमा धारिलो हतियारको चोट लागेको थियो र अहिले जिल्ला अस्पतालमा उपचाररत छन् ।
प्रहरीका अनुसार, प्रारम्भिक बयानमा राजेन्द्रले सासु आमाले चक्कु प्रहार गरेपछि रिसमा आएर हत्या गरेको बताएका छन् । घटनाको थप अनुसन्धान भइरहेको प्रहरीले जनाएको छ । प्रहरी अनुसन्धानका क्रममा राजेन्द्र राईले करिब एक वर्षअघि प्रेम विवाह गरेका थिए । यो घटनालाई पारिवारिक बिवादसँग जोडेर हेर्ने प्रयास भइरहेको छ भने वास्तविक कारण भने अझै खुल्न बाँकी छ ।
