- १४ भाद्र २०८३, आईतवार / Aug 30, 2026
काठमाडौं, १४ भदौ । रसुवाको भोटेकोशी नदीमा तत्काल ठूलो बाढीको जोखिम नरहेको बाढी पूर्वानुमान महाशाखाले जनाएको छ ।महाशाखाका अनुसार भोटेकोशी नदीको बहाव केही बढेको भए पनि अहिले ठूलो बाढी आउने जोखिम देखिएको छैन ।
यसअघि जिल्ला प्रहरी कार्यालय रसुवाले भोटेकोशी नदीमा बाढीको बहाव बढेको जस्तो आवाज सुनिएको जानकारी गराएपछि सम्भावित जोखिमलाई ध्यानमा राख्दै नदी किनारमा सतर्कता अपनाउन आग्रह गरिएको थियो । महाशाखाले रसुवा, नुवाकोट र धादिङका नदी किनारमा रहेका बासिन्दालाई सम्भावित जोखिमलाई ध्यानमा राख्दै सावधानी अपनाउन भनेको थियो ।
तर पछिल्लो अवस्थाबारे स्पष्ट पार्दै महाशाखाले अहिलेलाई भोटेकोशीमा ठूलो बाढीको जोखिम नरहेको जनाएको छ । नदीको बहावमा केही वृद्धि भए पनि तत्काल ठूलो जोखिमको अवस्था नरहेको महाशाखाको भनाइ छ ।
बाढीसम्बन्धी विभिन्न सूचना तथा हल्ला फैलिन सक्ने भएकाले आधिकारिक पुष्टि नभएका विवरणको पछि नलाग्न महाशाखाले आग्रह गरेको छ । साथै नदी आसपासका बासिन्दालाई आवश्यक सावधानी अपनाउँदै सम्बन्धित निकायबाट जारी हुने आधिकारिक सूचनामा ध्यान दिन अनुरोध गरिएको छ ।
