- २९ श्रावण २०८३, शुक्रबार / Aug 14, 2026
हेटौंडा, १६ जेठ। मकवानपुरको बकैया गाउँपालिका–७ मैनाटारमा बिच्छिको टोकाइबाट ८ वर्षीया बालिकाको ज्यान गएको छ। स्थानीय वीरबहादुर वाइवाकी छोरी अस्मिता वाइवाको बुधबार साँझ आफ्नै घरमा नुहाइसकेपछि कपडा बदल्ने क्रममा बिच्छिले टोकेको थियो।
घाइते बालिकालाई तत्कालै अस्पताल नपुर्याउँदा अवस्था जटिल बन्दै गयो। टोकेको करिब २० घण्टा पछि मात्र दिउँसो २ बजेतिर सास फेर्न गाह्रो भएपछि उनलाई हेटौंडा अस्पताल ल्याइएको थियो। तर, उपचारका क्रममा राति ८ बजे चिकित्सकले अस्मितालाई मृत घोषणा गरे।
घटनाको जानकारीपछि प्रहरी चौकी हात्तिसुडेबाट प्रहरी नायब निरीक्षक जनक बहादुर तामाङको नेतृत्वमा टोली खटिएको छ र थप अनुसन्धान भइरहेको जनाइएको छ। हाल बालिकाको शव हेटौंडा अस्पतालमै राखिएको छ।
