- २८ आश्विन २०८३, बुधबार / Oct 14, 2026
चितवन, १६ जेठ । चितवनको भरतपुर महानगरपालिका–१६ स्थित शिवघाट क्षेत्रमा नारायणी नदीको बीच भागमा फसेका २२ जनाको सकुशल उद्धार गरिएको छ। सशस्त्र प्रहरी बल नेपाल नं. १७ गण, चितवनबाट खटिएको गोताखोर टोलीले उनीहरूलाई सुरक्षित रूपमा बाहिर निकालेको हो।
बाँध बाँधेर गिट्टी–बालुवा उत्खननको कार्य भइरहेको बेला अचानक बाँध फुट्दा ती सबैजना नदीको बीच टापुमा फसेका थिए। सूचना प्राप्त भएलगत्तै प्रहरी निरीक्षक चामनारायण महतोको नेतृत्वमा उद्धार टोली बोटको सहायताले घटनास्थल पुगेको थियो।
उक्त घटनामा प्रयोग भइरहेको एउटा टिपर भने बाढीको बहावमा परी डुबेको छ। यद्यपि मानवीय क्षति भने भएको छैन। सुरक्षा निकायको तिव्र प्रतिक्रिया र उद्धार प्रयासका कारण ठूलो दुर्घटना टारिएको छ।
