- १५ जेष्ठ २०८३, शुक्रबार / May 29, 2026
काठमाडौँ । अख्तियार दुरुपयोग अनुसन्धान आयोगले चिकित्सा विज्ञान राष्ट्रिय प्रतिष्ठान (वीर अस्पताल) मा कार्यरत लेखा अधिकृत ढुण्डिराज दाहाललाई एक लाख रुपैयाँभन्दा बढी घुससहित नियन्त्रणमा लिएको छ।
लेखा अधिकृत दाहालले विभिन्न सप्लायर्स कम्पनी र ठेकेदारहरूलाई नियमानुसार बिल भुक्तानीका लागि रकम दिनु पर्ने प्रक्रियामा घुस माग्दै आएको सूचनाका आधारमा आइतबार पक्राउ गरिएको अख्तियारका प्रवक्ता राजेन्द्रकुमार पौडेलले जानकारी दिए।
दाहालले मागेको घुसरकम १ लाख २० हजार ५८० रुपैयाँ कार्यकक्षमा लुकाइराखेको अवस्थामा आयोगको टोलीले बरामद गरेको हो।अख्तियारले आवश्यक अनुसन्धान अघि बढाएको छ र भ्रष्टाचारका विरुद्ध कडा कारबाही प्रक्रिया अघि बढाइने जनाएको छ।
