- १५ जेष्ठ २०८३, शुक्रबार / May 29, 2026
काठमाडौँ, २७ असाेज । जेनजीका नाममा आन्दोलनरत समूहको मागअनुसार भोटेकोशी जलविद्युत आयोजनाले आफ्नो सेयरको १० प्रतिशत स्थानीयलाई निःशुल्क दिने सहमति जनाएको छ।
भोटेकोशी पावर कम्पनी प्राइभेट लिमिटेडले आफ्नो सेयरमध्येबाट १० प्रतिशत सेयर आयोजनाको जलविद्युत उत्पादन क्षेत्रका प्रत्यक्ष प्रभावित बासिन्दा समेटी खडा भएको लगानी गर्ने पब्लिक लिमिटेड कम्पनीलाई प्रदान गर्ने निर्णय गरेको हो।
‘भोटेकोशी जेनजी ग्रुप’को अगुवाइमा भएको आन्दोलनका कारण एक महिनासम्म आयोजना ठप्प भएको थियो। कम्पनीले सुरुमा निःशुल्क सेयर दिन अस्वीकार गरे पनि निरन्तर दबाबपछि आइतबार सम्झौता भएको हो।
सम्झौताअनुसार, कम्पनीले आफ्नै सेयरको १० प्रतिशत भाग ‘जेनजी पब्लिक इन्भेष्टमेन्ट पब्लिक लिमिटेड’ मार्फत प्रभावित स्थानीय बासिन्दालाई दिनेछ। यसअघि ६ प्रतिशत सेयर दिने सम्झौता भए पनि अब थप ४ प्रतिशत वृद्धि गरिएको छ।
सम्झौतापत्रमा जेनजी कम्पनीका अध्यक्ष फुर्पा शेर्पा र भोटेकोशी पावर कम्पनीका सचिव विश्वमोहन कर्माचार्यले हस्ताक्षर गरेका छन्।
