- २६ भाद्र २०८३, शुक्रबार / Sep 11, 2026
काठमाण्डौ । पहिरोका कारण बर्दघाट सुस्तापूर्व नवलपुरमा कालीगण्डकी करिडोर अवरुद्ध छ । कालीगण्डकी करिडोर र बेनी–दरबाङ सडक अवरुद्ध भएका छन् । बौदिकाली गाउँपालिका–३ जन्तीपहिरोमा गएराति पहिरो खसेपछि करिडोर पूर्ण रूपमा अवरुद्ध भएको जिल्ला प्रहरी कार्यालय नवलपरासी पूर्वका प्रहरी नायब उपरीक्षक वेदबहादुर पौडेलले जानकारी दिए ।
लेदोसहित पहिरो खसेकोले जन्तीपहिरोमा तत्काल पहिरो हटाउन सक्ने अवस्था नरहेको प्रहरी नायब उपरीक्षक पौडेलले बताए। सडक अवरुद्ध हुँदा नारायणगढ–गैँडाकोट हुँदै नवलपरासी पूर्वका पहाडी क्षेत्र तथा पाल्पा, स्याङ्जाका लागि चल्ने गाडीहरु पहिरोका कारणले चल्न सकका छैनन् ।
त्यस्तै म्याग्दीको बेनी–दरबाङ सडक पनि अवरुद्ध छ । म्याग्दीको बेनी नगरपालिका–४ र मङ्गला गाउँपालिका–२ को सिमाना फापरखेतमा पहिरो खस्दा सडकखण्ड अवरुद्ध भएको छ । निरन्तरजसो पानी परेको र पहिरो पनि खसिरहेकाले निक्कै समस्या भएकोे सिङ्गा तातोपानीका व्यवसायी कुमार केसीले बताए ।
