- २१ कार्तिक २०८३, शनिबार / Nov 7, 2026
मनाङ । मनाङ र चीनको सिमानामा बोर्डर आउट पोष्ट (बिओपी) स्थापना गरिने भएको छ । हिमाली जिल्ला मनाङ र चीनको सीमा नाका निर्धारण गर्ने उद्देश्यले बीओपी राखिने भएको हो । बीओपी नार्पाभूमि गाउँपालिकामा स्थापना गरिने भएको हो ।
बिओपी स्थापनाका लागि २० रोपनी जग्गा दीर्घकालीन रुपमा भाडामा सशस्त्र प्रहरीलाई उपलब्ध गराइएको जिल्ला प्रशासन कार्यालयले जनाएको छ । सरकारी जग्गा आवश्यकता अनुसार सशस्त्र प्रहरीले उपयोग गर्ने गरी भाडामा जग्गा उपलब्ध गराइएको प्रशासन कार्यालयले जनाएको छ ।
नार्पाभूमि गाउँपालिका–४ फू गाउँमा बिओपी स्थापना गरिने जिल्ला प्रशासन कार्यालय मनाङले जनाएको छ । समुद्री सतहदेखि करिब चार हजार मिटर उचाइमा बिओपी स्थापना गर्न लागिएको हो । सीमामा सहजता र सुरक्षाका लागि बिओपी स्थापना गर्न लागिएको हो ।
बिओपीमा प्रहरी निरीक्षकसहित ३५ जना सशस्त्र प्रहरी खटाइनेछ । नार्पाभूमि गाउँपालिकासँग समन्वय गरेर अघि बढ्ने र छिटो भन्दा छिटो बिओपी गरिने जनाएको छ । नार्पाभूमि चीनको स्वशासित क्षेत्र तिब्बतसँग सीमा जोडिएको पालिका हो ।
फू गाउँ पुग्न सदरमुकाम चामेबाट दुई दिन लाग्दछ । जग्गा भाडाको प्रमाणपत्र सशस्त्र प्रहरी बल नं. ३२ का गुल्मपति सशस्त्र प्रहरीलाई हस्तान्तरण गरिएको छ ।
