बुद्धशान्तिमा ८४ वर्षीय वृद्धले आफ्नै शरीरमा आगो लगाइ मृत्यु

झापा, २९ कार्तिक । झापाको बुद्धशान्ति गाउँपालिका–६ सन्तपुरका ८४ वर्षीय डिल्लीराम अधिकारीले आफ्नै शरीरमा आगो लगाइ मृत्यु भएको प्रहरीले जनाएको छ।

शनिबार राति करिब ११:३० बजे घरबाहिर आगनमा पेट्रोल छर्की आत्मदाह प्रयास गरेको प्रहरीले पुष्टि गरेको हो। डिल्लीरामका काइला छोरा भोगेन्द्र अधिकारीले राति करिब १ बजे बुबालाई अचेत अवस्थामा देखेपछि इलाका प्रहरी कार्यालय बुधबारेमा खबर गरेका थिए।

सूचना पाएलगत्तै प्रहरी नायब निरीक्षक चन्द्रबहादुर राउतको नेतृत्वमा खटिएको टोलीले घटनास्थल सुरक्षित गरेको छ। थप अनुसन्धानका लागि इलाका प्रहरी कार्यालय धुलाबारेबाट प्रहरी नायब निरीक्षक नकुलराज गौतमको नेतृत्वमा अर्को टोली समेत घटनास्थलतर्फ गएको छ।

परिवारका सदस्यहरूका अनुसार डिल्लीराम केही समयदेखि डिप्रेसनको उपचार गराइरहेका थिए। केही महिनाअघि मात्र उनले प्रोस्टेटसम्बन्धी शल्यक्रिया गराएका थिए। परिवारले उनी मृत अवस्थामा फेला परेको पुष्टि गरेका छन्। प्रहरीले आत्मदाहको कारणबारे विस्तृत अनुसन्धान भइरहेको जनाएको छ।